Starbucks Şimali Amerikada zəif nəticə göstərən 250 qəhvəxanasını bağlamağa hazırlaşır. Şirkət bu addımı baş direktor Brayan Nikkolun satışları canlandırmaq və biznesi yenidən qurmaq planının bir hissəsi kimi həyata keçirəcək. Bu barədə Reuters agentliyi məlumat yayıb.
Redaksiya istinadla xəbər verir ki, bağlanacaq obyektlər Starbucks-ın Şimali Amerikadakı təxminən 18 min qəhvəxanasının 1 faizinə yaxın hissəsini təşkil edir. Şirkət mağazaların əksəriyyətinin bağlanmasını 2026-cı maliyyə ilinin sonunadək başa çatdırmağı planlaşdırır.
Yeni restrukturizasiya tədbirlərinin Starbucks-a təxminən 300 milyon dollara başa gələcəyi gözlənilir. Şirkət daha əvvəl də gəlirliliyi aşağı olan bir sıra obyektləri, o cümlədən Sietldəki məşhur qovurma mərkəzini bağlamışdı.
Brayan Nikkolun rəhbərliyi altında Starbucks ABŞ-da müştəriləri geri qaytarmaq üçün gözləmə müddətini azaltmağa, menyunu sadələşdirməyə və qəhvəxanalardakı xidmət modelini yeniləməyə çalışır. Şirkət eyni zamanda 2026-cı maliyyə ili üzrə qlobal yeni mağaza açılışları proqnozunu əvvəlki 600-650-dən təxminən 440-a endirib.