Apple şirkətinin yüksək vəzifəli rəhbərinin məhkəmədə yalan danışdığına dair ittihamlar gündəmə gəlib. Məhkəmə prosesi zamanı səslənən ifadələr və ortaya çıxan faktlar, şirkətin nüfuzuna ciddi zərbə vurub.
Redaksiya xarici The Verge mətbuatına istinadla xəbər verir ki, hakim Yvonne Gonzalez Rogers, Apple-ın maliyyə üzrə vitse-prezidenti Alex Romanın ifadələrini "yanıltma və açıq-aşkar yalanlarla dolu" olaraq qiymətləndirib. Hakimin sözlərinə görə, Roman, Apple-ın App Store xaricindəki alış-verişlərə tətbiq edəcəyi 27 faizlik komissiya ilə bağlı qərarın 16 yanvar 2024-cü il tarixinə qədər verilmədiyi barədə yalan danışıb.
Hakim Rogers, "Müvafiq biznes sənədləri göstərir ki, əksinə, Apple-ın planının əsas komponentləri, o cümlədən 27 faizlik komissiya, 2023-cü ilin iyul ayında müəyyən edilib," deyə bildirib. O, həmçinin qeyd edib ki, nə Apple, nə də onun hüquqşünasları, indi açıq-aşkar olan yalanları düzəltməyiblər.
Hakim, bu işi Apple və Roman əleyhinə mümkün cinayət məsuliyyətinə cəlb etmək üçün ABŞ prokurorluğuna göndərəcəyini də bildirib. Rogers, Apple-ın məhkəmənin qərarına qəsdən əməl etmədiyini və bununla da rəqabətə zidd yeni maneələr yaratmaq istədiyini vurğulayıb. Hakim, Apple-ın bu cür itaətsizliyə dözüləcəyini düşünməsinin "böyük bir səhv" olduğunu qeyd edib.
Məhkəmənin qərarı, Apple-ın App Store üzərindəki nəzarətinə ciddi zərbə vurmaqla yanaşı, şirkətin daxili idarəetməsi və əməkdaşlarının dürüstlüyü ilə bağlı suallar yaradıb. Bu hadisə, texnologiya dünyasında böyük rezonans doğurub və Apple-ın gələcək fəaliyyətinə təsir edəcəyi gözlənilir.
Fərid Əlizadə