Cənubi Koreya hakimiyyəti ölkə limanlarından Rusiyaya aparıldığı bildirilən 176 min tondan çox neft məhsulu ilə bağlı araşdırmaya başlayıb. Məlumata görə, yükün bir hissəsi Böyük Britaniya və Avropa İttifaqının sanksiyalarına məruz qalan tankerlərlə daşınıb. Bu barədə Clash Report məlumat yayıb.
Redaksiya istinadla xəbər verir ki, Cənubi Koreyanın Xarici İşlər Nazirliyi, Ticarət Nazirliyi və gömrük xidməti gəmilərin marşrutlarını, bəyan edilmiş təyinat məntəqələrini və sonradan istiqamətin dəyişdirilməsinin səbəblərini araşdırır. Seul qanun pozuntusu aşkarlanacağı təqdirdə müvafiq hüquqi tədbirlərin görüləcəyini bildirib.
Araşdırmalara əsasən, iyul-avqust aylarında yeddi tanker Cənubi Koreya limanlarından Rusiyanın Uzaq Şərq limanlarına 14 reys həyata keçirib. Daşınan yüklərin əsas hissəsinin dizel yanacağı olduğu bildirilir. Bu gəmilərdən üçünün Böyük Britaniya və Aİ sanksiyaları altında olduğu qeyd olunur.
Sanksiyalı Layla tankerinin Ulsandan Vladivostoka iki reys zamanı təxminən 57 min ton dizel daşıdığı bildirilir. Astoria tankerinin isə Ulsanda təxminən 11 min ton yük götürdükdən sonra əvvəlcə Yaponiya limanını təyinat nöqtəsi kimi göstərdiyi, daha sonra Vladivostoka getdiyi qeyd olunur.
Seul eyni zamanda vurğulayır ki, neft məhsullarının Cənubi Koreya limanlarında yüklənməsi özlüyündə ölkə qanunlarının pozulması demək deyil. Emal olunmuş neft məhsulları Cənubi Koreyanın Rusiyaya qarşı tətbiq etdiyi ixrac məhdudiyyətlərinin əsas siyahısına daxil deyil. Gömrük məlumatlarında Rusiyaya birbaşa dizel, aviasiya yanacağı və ya benzin ixracının rəsmiləşdirilməsi də qeydə alınmayıb.
Cənubi Koreya hökuməti yüklərin həqiqətən Cənubi Koreya mənşəli olub-olmadığının da hələ müəyyən edilmədiyini bildirir. Gəminin əvvəlcədən bəyan etdiyi istiqamətdən yayınması isə təkbaşına saxta gömrük məlumatı verildiyini sübut etmir.
Məsələ Ukraynanın Rusiya neft emalı zavodlarına dron hücumlarından sonra Rusiyada yanacaq çatışmazlığının gücləndiyi dövrə təsadüf edib. Ukrayna tərəfi Cənubi Koreya limanlarından gələn yanacağın Rusiyadakı çatışmazlığın təsirini azaltdığını iddia edir. Seul isə sanksiyaları və ixrac nəzarətini ardıcıl şəkildə tətbiq etdiyini bildirərək bu ittihamları qəbul etmir.