Rusiyada 2026-cı ilin ilk yarısının yekunlarına görə ikinci vətəndaşlıq və xarici ölkələrdə yaşayış icazəsi almağa maraq artıb. Rusiyalıların xüsusilə ada dövlətlərinin investisiya və miqrasiya proqramlarına daha çox müraciət etdiyi bildirilir. Bu barədə RBK məlumat yayıb.
Redaksiya istinadla xəbər verir ki, marağın yüksəldiyi ölkələr sırasında Vanuatu, San-Tome və Prinsipi, Nauru Respublikası və Mavriki yer alır. Bu istiqamətlər daha çevik müraciət prosedurları və investisiya yolu ilə status əldə etmək imkanları ilə seçilir.
Müraciət edənlər ikinci pasport və ya yaşayış icazəsindən beynəlxalq səfərləri asanlaşdırmaq, biznes fəaliyyətini genişləndirmək və ailə üzvləri üçün alternativ yaşayış imkanları yaratmaq məqsədilə istifadə etməyə çalışırlar.
Mütəxəssislər tələbin artmasını geosiyasi qeyri-müəyyənlik, viza məhdudiyyətləri və kapitalın müxtəlif ölkələr arasında bölüşdürülməsi istəyi ilə əlaqələndirirlər. Ayrı-ayrı proqramların şərtləri, tələb olunan investisiya məbləği və müraciət müddəti ölkədən ölkəyə dəyişir.