ASUS, MSI və GIGABYTE şirkətlərinin yaxın aylarda ana plataların qiymətlərini artırmağa hazırlaşdıqları bildirilir. Bahalaşmanın əsas səbəbi kimi istehsal xərclərinin kəskin yüksəlməsi göstərilir.
Redaksiya xəbər verir ki, təchizat zəncirindən yayılan məlumatlara əsasən, istehlakçı ana platalarında istifadə olunan çap dövrə lövhələrinin qiyməti 2026-cı ildə 50 faizədək arta bilər. Mis, kondensatorlar, enerji komponentləri və idarəetmə çiplərinin də bahalaşdığı qeyd olunur.
İstehsalçıların əlavə xərclərin bir hissəsini məhsulların satış qiymətinə daxil etməyi planlaşdırdıqları bildirilir. Konkret qiymət artımının nə qədər olacağı və hansı modellərə şamil ediləcəyi hələ rəsmi şəkildə açıqlanmayıb.
Bahalaşma ana plata bazarında tələbin zəif olduğu dövrə təsadüf edir. Mütəxəssislərin fikrincə, qiymətlərin yüksəlməsi kompüterini yeniləmək istəyən istifadəçilərin alış qərarlarını təxirə salmasına və istehsalçıların satışlarına əlavə təzyiq göstərməsinə səbəb ola bilər.