Ukrayna bildirir ki, Rusiya ordusu ilk dəfə olaraq Dnipropetrovsk vilayətinə yerüstü hücumlar həyata keçirməyə başlayıb. Bu, Rusiyanın müharibə xəritəsində yeni bir cəbhə açdığı anlamına gəlir və analitiklər bu gedişi həm simvolik, həm də strateji dönüş nöqtəsi kimi dəyərləndirirlər. Müdafiə Nazirliyi bu irəliləyişin Donetsk Xalq Respublikası ərazisindən qərbə doğru istiqamətləndiyini açıqlayıb.
Redaksiya xəbər verir ki, Ukrayna Cənub Hərbi Komandanlığının yaydığı rəsmi açıqlamada, Rusiya qüvvələrinin Dnipropetrovsk istiqamətində genişmiqyaslı dron və artilleriya hücumları ilə müşayiət olunan yerüstü əməliyyatlar keçirdiyi bildirilir. Prezident Zelenskinin daha əvvəl Sumı istiqamətində 50 min rus əsgərinin toplandığı barədə xəbərdarlığı bu hücumların xəbərçisi kimi qiymətləndirilə bilər.
Rusiya Təhlükəsizlik Şurasının sədr müavini Dmitri Medvedyev isə bu hücumlarla bağlı verdiyi açıqlamada, “Kiyevə xəbərdarlıq olunmuşdu: əgər müharibənin reallıqlarını danışıqlarda qəbul etmirsinizsə, o zaman yerində sizə yeni reallıqlar təqdim ediləcək,” – deyə bildirib. O əlavə edib ki, “Bandera dövlətinin xam dərisi daralır. Parazitlərə qarşı dezinfeksiya prosesi davam edir.”
Hərbi müşahidəçilər bildirirlər ki, bu hücum, Ukraynanın cənub və mərkəzindəki müdafiə xətlərini zəiflətmək və Rusiya üçün danışıqlarda üstünlük əldə etmək məqsədi daşıyır.
Sevinc Kərimova