ABŞ dövlət katibi Marko Rubio İran, Hörmüz boğazı, Kuba, Livan və NATO ilə bağlı bir sıra sərt açıqlamalar verib. O bildirib ki, Vaşinqtonun əsas məqsədi Hörmüz boğazında müharibədən əvvəlki status-kvonun bərpa olunmasıdır.
Redaksiya ABŞ mediasına istinadla xəbər verir ki, Rubio İranda inflyasiyanın 70 faizə çatdığını və milli valyutanın tam sərbəst eniş vəziyyətində olduğunu deyib. O, İranın sanksiyalardan yayınmasına kömək edən hər hansı xarici maliyyə qurumu və ya kommersiya aktorunun ABŞ maliyyə sisteminə çıxışını itirə biləcəyi barədə xəbərdarlıq edib.
Rubio İran rəhbərliyini sərt ifadələrlə tənqid edərək bu ölkənin dünyanı böhrana sürüklədiyini bildirib. Onun sözlərinə görə, “dünya İranın qurbanıdır” və Tehran regional sabitlik üçün əsas təhlükə mənbələrindən birinə çevrilib.
ABŞ dövlət katibi Hörmüz boğazı ilə bağlı bildirib ki, Vaşinqtonun üstünlük verdiyi ssenari boğazda müharibədən əvvəlki vəziyyətə qayıdılmasıdır. Rubio ABŞ-ın “Epic Fury” əməliyyatının həmin mərhələsinin artıq başa çatdığını da qeyd edib.
Kuba ilə bağlı danışan Rubio hazırda adaya qarşı ayrıca neft blokadasının olmadığını bildirib. Bununla belə, o, Kubadakı mövcud vəziyyətin qəbuledilməz olduğunu və ABŞ-ın bu məsələ ilə məşğul olacağını deyib.
Rubio Livanla bağlı isə İsrail və Livan hökumətləri arasında birbaşa problem olmadığını iddia edib. O vurğulayıb ki, İsrail Livan ərazisinə iddia etmir və əsas məsələ regional təhlükəsizlik riskləridir.