Slovakiya Baş Naziri Robert Fiko Ukrayna Prezidenti Volodimir Zelenskinin "Drujba" neft kəmərinin zədələnməsi barədə verdiyi açıqlamaları təkzib edib.
Redaksiya məlumat verir ki, Fiko peyk şəkillərini gördüyünü və bu şəkillərin kəmərin işlək vəziyyətdə olduğunu sübut etdiyini bildirib. Onun sözlərinə görə, kəmərdə Slovakiya, Macarıstan və Avropaya neft tədarükünü maneə törədəcək miqyasda heç bir zərər yoxdur.
Baş nazir əlavə edib ki, "Drujba" neft kəmərinin əsas xətti zədələnməyib, yalnız kiçik bir ehtiyat çənində kiçik bir problem ola bilər. O, Zelenskinin yalan danışdığını və bunun sübut olunduğunu qeyd edib.
Fiko həmçinin vurğulayıb ki, Volodimir Zelenski heç kəsə, hətta Slovakiyanın Kiyevdəki səfirinə və ya hər hansı bir yoxlama qrupuna "Drujba" kəmərinə baxmağa icazə vermir. O, Zelenskinin həqiqətdən qorxduğunu və ya neft kəmərini dağıtmaq üçün vaxt qazandığını iddia edib.
Qeyd edək ki, Rusiya neftinin Slovakiyaya və Macarıstana tranziti fevralın 13-də dayandırılıb. Kiyev ölkənin qərbində avadanlığın zədələndiyini bildirib, lakin bununla bağlı heç bir dəlil təqdim etməyib.