İranın yüksək rütbəli hərbi-siyasi rəsmisi Möhsün Rezayi ABŞ-ın regiondan məsuliyyətsiz şəkildə çıxmasına imkan verilməyəcəyini bildirib. O qeyd edib ki, Vaşinqton Yaxın Şərqdə yaratdığı böhranların hesabını vermədən “qapını bağlayıb” gedə bilməz.
Redaksiya İran mediasına istinadla xəbər verir ki, Rezayi ABŞ-ın bölgədəki hərbi mövcudluğunu son 50 ildə qeyri-sabitliyin əsas səbəblərindən biri kimi qiymətləndirib. Onun sözlərinə görə, Fars körfəzi və Hörmüz boğazında təhlükəsizliyin təmin olunması üçün ABŞ qüvvələri regiondan çıxmalı, təhlükəsizlik isə regional ölkələr tərəfindən idarə edilməlidir.
Rezayi bildirib ki, İran ABŞ-ın regiondan sadəcə geri çəkilərək məsələni bitmiş kimi təqdim etməsinə imkan verməyəcək. O, Vaşinqtonun müharibə və təzyiq siyasətinin nəticələrinə görə cavabdehlik daşımalı olduğunu vurğulayıb.
Açıqlama ABŞ və İran arasında Hörmüz boğazı, regional təhlükəsizlik və mümkün razılaşma ilə bağlı danışıqların davam etdiyi vaxtda səslənib. Tehran Vaşinqtondan təhlükəsizlik zəmanətləri, sanksiyaların aradan qaldırılması və regiondakı hərbi mövcudluğun azaldılmasını tələb edir.