Birləşmiş Ərəb Əmirliklərinin Müdafiə Nazirliyi ölkə ərazisinə daxil olan üç pilotsuz uçuş aparatının aşkarlandığını açıqlayıb.
Redaksiya məlumat verir ki, PUA-lar mayın 17-də qərb istiqamətindən BƏƏ hava məkanına daxil olub. Hava hücumundan müdafiə sistemləri onlardan ikisini zərərsizləşdirib.
Nazirliyin açıqlamasına görə, üçüncü dron Əl-Dhafra bölgəsində yerləşən Barakah Atom Elektrik Stansiyasının daxili təhlükəsizlik perimetrindən kənarda yerləşən elektrik generatoruna zərbə endirib.
BƏƏ tərəfi hadisə ilə bağlı araşdırmanın davam etdiyini bildirib. Hücumun mənbəyi barədə hələlik rəsmi açıqlama verilməyib.
Açıqlamada Müdafiə Nazirliyinin ölkənin təhlükəsizliyinə qarşı bütün təhdidlərə cavab verməyə hazır olduğu vurğulanıb.
“Qərb istiqaməti” ifadəsi coğrafi baxımdan Səudiyyə Ərəbistanı, İraq və ya Yəmən istiqamətini nəzərdə tuta bilər. Lakin dronların hansı ölkədən göndərildiyi hələlik təsdiqlənməyib.
