İtaliyanın “Liqa” partiyasının lideri Matteo Salvini Ukraynanın “Mirotvorets” saytında adının yer almasına etiraz edərək Kiyevə hərbi yardımın davam etdirilməsinə qarşı çıxa biləcəyini bildirib. O, Ukrayna Prezidenti Volodimir Zelenskidən üzr istəməyi və saytın fəaliyyətinin rəsmi şəkildə pislənilməsini tələb edib. Bu barədə İtaliyanın “Il Fatto Quotidiano” nəşri məlumat yayıb.
Redaksiya mənbəyə istinadən xəbər verir ki, Salvini Ukrayna hakimiyyətinin “Mirotvorets” saytının fəaliyyətini rəsmi şəkildə pisləməyəcəyi təqdirdə Kiyevə növbəti hərbi yardımın göstərilməsinə qarşı çıxacağını açıqlayıb.
İtaliyalı siyasətçi adının mübahisəli məlumat bazasına daxil edilməsini qəbuledilməz hesab etdiyini bildirib. O, Zelenskinin bu məsələyə münasibət bildirməsini və üzr istəməsini tələb edib.
Məsələ İtaliyanın Baş naziri Corca Meloni ilə Ukrayna Prezidenti Volodimir Zelenski arasında da müzakirə olunub. Məlumata görə, Meloni yaranmış vəziyyəti qəbuledilməz adlandırıb.
Bundan sonra Ukraynanın Romadakı səfirliyi açıqlama yayaraq “Mirotvorets” saytının Ukrayna dövlət orqanlarının rəsmi informasiya mənbəyi olmadığını bildirib.
Diplomatik nümayəndəlik vurğulayıb ki, saytda yayımlanan məlumatlar Ukrayna dövlətinin rəsmi mövqeyini əks etdirmir.
Lakin səfirliyin izahı Salvinini qane etməyib. “Liqa” partiyasının lideri saytın tamamilə bağlanmasını tələb edib.
Qeyd edək ki, “Mirotvorets” Ukraynada fəaliyyət göstərən və müxtəlif şəxslər haqqında məlumatlar dərc edən mübahisəli internet resursudur. Sayt şəxsi məlumatların yayımlanması və insanların təhlükəsizliyinə yarada biləcəyi risklər səbəbindən tənqid olunur.
Salvininin açıqlamasına baxmayaraq, İtaliyanın Ukraynaya hərbi yardımının dayandırılması barədə rəsmi qərar qəbul edildiyinə dair məlumat yoxdur.
