2025-ci ilin aprel ayı etibarilə qızılın qiyməti tarixi rekord qıraraq bir unsiya üçün 3,333 ABŞ dollarına yüksəlib. Bu artım bir neçə qlobal və regional amillərlə əlaqələndirilir və investorlar arasında narahatlıqların artması ilə üst-üstə düşür.
Redaksiya xəbər verir ki, ABŞ ilə Çin arasında davam edən ticarət gərginlikləri, Çin Mərkəzi Bankının qızıl ehtiyatlarını artırması və Çində sığorta şirkətlərinə qızıl investisiyalarına icazə verilməsi qiymət artımının əsas səbəbləri arasında göstərilir. Xüsusilə, Çinin on sığorta şirkətinə aktivlərinin 1 faizini qızıl investisiyalarına yönəltməyə icazə verməsi bazarda illik əlavə 255 tonluq tələb yaradıb.
Digər tərəfdən, ABŞ dollarının zəifləməsi də qızılın daha cazibədar investisiya vasitəsinə çevrilməsinə səbəb olub. İnflyasiya narahatlıqları və qlobal iqtisadi qeyri-müəyyənliklər fonunda investorlar təhlükəsiz sığınacaq kimi qızıla üz tuturlar.
Analitiklərin proqnozlarına görə, yaxın aylarda qızılın qiyməti daha da arta bilər. Citi Research qiymətin 3,500 dolları keçəcəyini proqnozlaşdırır, Goldman Sachs isə bəzi ssenarilərdə bu qiymətin 3,950 hətta 4,500 dollara qədər yüksələ biləcəyini bildirir.
Hazırkı vəziyyət qlobal maliyyə bazarlarında sabitliyin zəiflədiyini və investorların riskləri minimuma endirmək üçün ənənəvi sərmayə alətlərinə üstünlük verdiyini göstərir.
Sevinc Kərimova