Alimlərin apardığı son araşdırmalara görə, qısa formatlı videoların intensiv izlənməsi insan beyninə mənfi təsir göstərir, diqqət və emosional sabitliyi zəiflədir. Mütəxəssislər bildirirlər ki, bu tip kontent uzunmüddətli konsentrasiyanı ciddi şəkildə azaldır və gündəlik funksional fəaliyyətə mane olur.
Redaksiya xəbər verir ki, tədqiqat nəticələri qısa videolara meyilli şəxslərdə diqqət çatışmazlığı və hiperaktivlik əlamətlərinin artdığını göstərir. Araşdırmalarda qeyd olunur ki, bu vərdiş yalnız iş qabiliyyətinə deyil, eyni zamanda sosial münasibətlərə və şəxsi inkişaf prosesinə də mənfi təsir edir.
Məlumata görə, davamlı şəkildə qısa videolar izləyən şəxslərdə narahatlıq pozuntuları və ağır depressiya riski xeyli yüksəlir. Eyni zamanda yuxu rejiminin pozulması, psixoloji gərginlik və emosional tükənmə hallarının artması müşahidə olunur.
Alimlər xüsusilə asılılıq riski olan şəxslər üçün vəziyyətin daha təhlükəli olduğunu vurğulayırlar. Bildirilir ki, qumar və narkotik meyli olan insanlarda qısa videolar mövcud asılılıqları gücləndirir və müalicə prosesini çətinləşdirir. Bu səbəbdən mütəxəssislər rəqəmsal məzmun istehlakının ciddi şəkildə məhdudlaşdırılmasını tövsiyə edirlər.