Çinin Long March 7A daşıyıcı raketi avqustun 10-da Vençan kosmodromundan buraxıldıqdan qısa müddət sonra havada parçalanıb. İlkin məlumatlara görə, raket məxfi təyinatlı Zhongxing-4B rabitə peykini orbitə çıxarmalı idi, lakin missiya uğursuzluqla nəticələnib. Bu barədə Reuters məlumat yayıb.
Redaksiya istinadla xəbər verir ki, raketin buraxılışdan təxminən 88 saniyə sonra sıradan çıxdığı və həm daşıyıcının, həm də faydalı yükün itirildiyi bildirilir. Hadisənin görüntüləri ərazidə olan şahidlər tərəfindən qeydə alınıb və raketin havada parçalandığını göstərib. Reuters şahidləri də raketin havaya qalxdıqdan az sonra dağıldığını təsdiqləyib.
İlkin qiymətləndirmələr nasazlığın raketin birinci mərhələsində yarandığını və bunun qəfil struktur dağılmasına səbəb olduğunu göstərir. Bununla belə, qəzanın dəqiq texniki səbəbi ilə bağlı yekun rəsmi nəticə hələ açıqlanmayıb.
Hadisə Çin kosmik proqramının 2026-cı ildə üzləşdiyi uğursuz buraxılışlar sırasına əlavə olunub və intensiv buraxılış qrafiki fonunda istehsal keyfiyyəti və nəzarət prosedurları ilə bağlı suallar yaradıb. Long March 7A geostasionar orbitlərə rabitə və digər peyklərin çıxarılması üçün istifadə edilən əsas Çin daşıyıcı raketlərindən biridir.