İran parlamentinin sədri Məhəmməd Baqer Qalibaf ABŞ və müttəfiqlərinin regiondakı son addımlarını tənqid edib. O, Vaşinqtonun irəli sürdüyü əməliyyat xəttinin uğursuzluğa düçar olduğunu bildirib.
Redaksiya məlumat verir ki, Qalibaf X hesabındakı açıqlamasında “Mənə inan, bro (qardaş)” əməliyyatının uğursuz olduğunu deyib. İran rəsmisinin sözlərinə görə, qarşı tərəf indi “saxta ssenarilər” vasitəsilə əvvəlki nizama qayıtmağa çalışır.
Qalibafın bu ifadəsi Tehranın ABŞ-ın regiondakı hərbi və diplomatik addımlarını etibarsız və nəticəsiz hesab etdiyini göstərir. İran tərəfi son açıqlamalarında Vaşinqtonun təzyiq siyasətinin danışıqlar üçün real zəmin yaratmadığını vurğulayır.
Açıqlama Hörmüz boğazı, İranla danışıqlar və ABŞ-ın bölgədəki hərbi mövcudluğu ətrafında müzakirələrin davam etdiyi vaxtda səslənib. Tehran hesab edir ki, regionda sabitlik yalnız xarici hərbi təzyiqin azalması və siyasi razılaşma yolu ilə mümkün ola bilər.