Panama Kanalı ətrafında davam edən strateji rəqabətdə yeni dönüş baş verib. Dünyanın ən böyük sərmayə şirkətlərindən biri olan BlackRockun kanal infrastrukturu ilə bağlı planlaşdırılan razılaşmasının rəsmən pozulması, bölgədə Çinin mövqeyini gücləndirib.
Redaksiya xəbər verir ki, ABŞ-Çin arasında qlobal logistik nəzarət uğrunda gedən mübarizənin əsas nöqtələrindən biri olan Panama Kanalında son hadisə Vaşinqton üçün ciddi geriləmə kimi qiymətləndirilir. ABŞ-ın dəstəklədiyi BlackRock-un kanalın su ehtiyatları və genişləndirilməsi ilə bağlı investisiya təşəbbüslərinin Panamanın daxili siyasi səbəblər və ictimai təzyiqlərlə üzləşərək geri çəkilməsi, Çinlə əməkdaşlığa daha açıq olan qüvvələrin üstünlük qazanmasına səbəb olub.
Məlumatlara görə, artıq Çin şirkətləri kanal ətrafında infrastruktur və logistika sahəsində yeni müqavilələr üçün danışıqlara başlayıb. Pekin rəhbərliyi uzun müddətdir Panama ilə iqtisadi və diplomatik əlaqələri gücləndirərək bu nöqtədəki mövqeyini genişləndirirdi.
Ekspertlər bildirir ki, kanalın idarəçiliyi və modernləşdirilməsi uğrunda gedən bu mübarizə yalnız iqtisadi deyil, həm də strateji təhlükəsizlik baxımından böyük əhəmiyyət daşıyır. Panama Kanalı dünya ticarətinin 5 faizinin keçdiyi bir nöqtə kimi Çin üçün kritik nəqliyyat qovşağı sayılır.
ABŞ rəsmiləri isə BlackRock razılaşmasının pozulmasından sonra bölgədəki maraqlarını qorumaq üçün alternativ addımlar üzərində düşünür. Siyasi analitiklər hesab edir ki, bu hadisə Vaşinqtonun Latın Amerikasındakı iqtisadi təsirinin zəiflədiyini göstərir və Çinin yumşaq güc strategiyasının effektivliyinə daha bir sübutdur.
Fərid Əlizadə