İran Ali Liderinin müşaviri Möhsün Rezayi Livanda artan gərginliklə bağlı İsrailə sərt xəbərdarlıq edib.
Redaksiya xəbər verir ki, Rezayi X sosial şəbəkəsində paylaşım edərək İranın səbrinin həddi olduğunu bildirib.
Onun sözlərinə görə, Tehran Livanda gərginliyin daha da artmasına və İsrailin hücumlarının genişlənməsinə dözməyəcək.
İranın Mərkəzi Hərbi Komandanlığı da İsrailin şimalında yaşayan sakinlərə xəbərdarlıq edib.
Bəyanatda bildirilib ki, əgər İsrail Beyruta hücum edərsə, zərər görmək istəməyən şimal İsrail sakinləri bölgəni tərk etməlidir.
“İsrail Beyruta hücum edərsə, şimal İsrail sakinlərini xəbərdar edirik: zərər görmək istəmirlərsə, bölgəni tərk etsinlər”, — deyə bəyanatda qeyd olunub.
Tasnim-in məlumatına görə, İran İsrailin Livandakı hərəkətləri səbəbilə ABŞ-la danışıqları dayandırıb.
Nəşr yazır ki, danışıqlar yalnız İsrail qüvvələrinin tam geri çəkilməsi və zərbələrin dayandırılmasından sonra bərpa oluna bilər.
Bundan əlavə, İranın Hörmüz boğazını tam bloklamaq və Bab əl-Məndəb boğazı da daxil olmaqla digər cəbhələri aktivləşdirmək qərarı barədə də məlumat yayılıb.
Bu açıqlamalar İsrail-Livan xəttində eskalasiyanın, ABŞ-İran danışıqlarının və regionun əsas dəniz keçidlərində təhlükəsizlik risklərinin kəskinləşdiyini göstərir.