Futbolun ulduzu Lionel Messi və "İnter Mayami" klubu, MLS Kubokundakı qələbələrini qeyd etmək məqsədilə Ağ Evdə ABŞ prezidenti Donald Tramp ilə görüşüb.
Redaksiya xəbər verir ki, görüş zamanı Tramp, Messi ilə braziliyalı əfsanəvi futbolçu Pelé arasında kimin daha yaxşı olduğu barədə sual qaldırıb.
Martın 6-sı, 2026-cı il tarixdə baş tutan ziyarətdə ABŞ prezidenti Donald Tramp "İnter Mayami" komandasını qəbul edib və oyunçularla, həmçinin texniki heyətlə bir araya gəlib. Tramp çıxışı zamanı "Daha əvvəl heç bir prezidentin demədiyi bir şeyi demək imtiyazına sahibəm: Lionel Messi, Ağ Evə xoş gəlmisiniz," deyərək, mövcud Dünya Kubokunun ən yaxşı oyunçusuna imzalanmış bir top hədiyyə edib.
Ziyarətdən əvvəl, dünyanın ən populyar idmançılarından biri hesab olunan Messinin iştirak edib-etməyəcəyi barədə suallar olsa da, CNN telekanalı onun iştirakını təsdiqləyib. "İnter Mayami"nin həmsahibi Corc Mas komandanın ilk çempionluğa doğru yolculuğundan bəhs edib və Trampa forma, top və saat hədiyyə edib.
Tramp, Messi ilə Pelé arasında kimin daha yaxşı oyunçu olduğu barədə sual verərək, Messiyə işarə edərək "Məncə odur," deyib. ABŞ prezidenti çıxışı zamanı 2020-ci il prezident seçkilərinin saxtalaşdırıldığı barədə əsassız iddialarını təkrarlayıb və ABŞın Kübaya mümkün müdaxiləsindən danışıb.
CNNin məlumatına görə, "İnter Mayami"nin digər həmsahibi David Bekhem, həyat yoldaşı Viktoriya ilə birlikdə dəb şousunda iştirak etmək üçün Avropada olduğundan Ağ Evə gəlməyib.
Lionel Messi daha əvvəl heç vaxt Ağ Evdə olmamışdı. ABŞ-nin sabiq prezidenti Co Bayden keçən il argentinalı ulduza Prezident Azadlıq medalını təqdim etsə də, Messi proqramının üst-üstə düşməsi səbəbindən mərasimə qatıla bilməmişdi. Messi dünyanın ən çox qazanan futbolçuları və idmançıları arasında yer alır. Forbes jurnalının 2025-ci il üzrə dünyanın ən çox qazanan futbolçuları siyahısında 130 milyon dollar gəlirlə ikinci yerdə qərarlaşan Messi, 280 milyon dollar qazanan Ronaldodan sonra ikinci olub. O, həmçinin 2025-ci ildə dünyanın ən çox qazanan beşinci idmançısı olub.