Almaniya Kansleri Fridrix Merts ABŞ qoşunlarının Avropadan çıxarılması ilə bağlı müzakirələrə münasibət bildirib. O, bu mövzunun müəyyən qədər şişirdilmiş ola biləcəyini, lakin yeni məsələ olmadığını deyib.
Redaksiya Welt-ə istinadla xəbər verir ki, Merts ABŞ-ın Şimali Atlantika alyansında Almaniyanın ən mühüm tərəfdaşı olaraq qaldığını vurğulayıb. Kansler bildirib ki, Donald Trampla əməkdaşlıqdan imtina etməyəcək və transatlantik əlaqələrin qorunmasını vacib hesab edir.
Mertsin sözlərinə görə, Avropa təhlükəsizliyi ilə bağlı qərarlarda müttəfiqlər arasında əvvəlcədən məsləhətləşmələr aparılmalıdır. O qeyd edib ki, Almaniyadan hər hansı münaqişədə yardım istəniləcəksə, Berlin əvvəlcədən proses barədə məlumatlandırılmalıdır.
Kanslerin açıqlaması ABŞ-ın Avropadakı hərbi mövcudluğu və NATO daxilində məsuliyyət bölgüsü ilə bağlı müzakirələrin davam etdiyi vaxtda səslənib. Berlin Vaşinqtonla əməkdaşlığı davam etdirmək istəsə də, Avropanın öz təhlükəsizlik yükünü daha çox daşımalı olduğunu bildirir.