Venesuelanın müxalifət lideri və Nobel Sülh mükafatı laureatı Mariya Korina Maçado ölkənin mövcud hakimiyyəti ilə bağlı kəskin açıqlamalar verib. O, vitse-prezident Delsi Rodrigesin etibarlılıqdan uzaq olduğunu bildirərək, hakim rejimin mahiyyətinin cəmiyyətə yaxşı məlum olduğunu vurğulayıb.
Redaksiya xəbər verir ki, Mariya Korina Maçado çıxışında “Delsi Rodrigesə heç kim etibar etmir. Hamı bu rejimin nə olduğunu bilir, biz cinayətkarlardan danışırıq” ifadələrini işlədib. Onun sözlərinə görə, Venesuelada mövcud siyasi idarəçilik hüquqi və əxlaqi legitimliyini itirib.
Müxalifət lideri ölkənin böyük təbii və iqtisadi resurslara malik olduğunu da qeyd edib. O bildirib ki, Venesuela bu resurslardan səmərəli istifadə etmək niyyətindədir və Amerika şirkətlərinin ölkəyə investisiya yatırmasını arzulayır.
Mariya Korina Maçadonun açıqlamaları Venesuelada davam edən siyasi böhran, beynəlxalq təcrid və iqtisadi çətinliklər fonunda səsləndirilib və müxalifətin xarici investisiyalar vasitəsilə ölkənin gələcəyini yenidən qurmaq istəyini bir daha gündəmə gətirib.