Kremlin sözçüsü Dmitri Peskov Rusiyanın Donetsk vilayətinin Ukraynanın nəzarətində qalan hissələri uğrunda döyüşü davam etdirəcəyini bildirib. O, hətta ərazinin çox kiçik hissəsi qalsa belə, Moskvanın mövqeyinin dəyişməyəcəyini deyib. Bu barədə Interfax məlumat yayıb.
Redaksiya istinadla xəbər verir ki, Peskov müsahibəsində Rusiyanın hətta Donetskin 0,01 faizi uğrunda belə mübarizə aparmağa hazır olduğunu bildirib. Onun sözlərinə görə, Moskva həmin əraziləri Rusiya Federasiyasının tərkib hissəsi hesab edir və bu məsələni müzakirə predmeti saymır.
Peskov eyni zamanda Rusiya Prezidenti Vladimir Putinin münaqişənin sülh yolu ilə həllini üstün tutduğunu xatırladıb. Bununla belə, o, hazırkı şəraitdə bunun mümkün olmadığını və Rusiya qüvvələrinin döyüş əməliyyatlarını davam etdirəcəyini deyib.
Kremlin sözçüsü Rusiyaya ağır zərbə vurmaq planları quran tərəflərin bunun nəticələri ilə üzləşəcəyini də bildirib. Moskva bu mövqeni Ukraynadakı hərbi əməliyyatların davam etdirilməsi üçün əsaslandırma kimi təqdim edir.
Rusiya 2022-ci ildə Donetsk vilayətini öz ərazisinə birləşdirdiyini elan edib, lakin vilayətin bir hissəsi hələ də Ukraynanın nəzarətindədir. Ukrayna və beynəlxalq ictimaiyyətin böyük hissəsi bu ilhaqı tanımır və Donetsk vilayətini Ukraynanın suveren ərazisi hesab edir.