Rusiyanın xarici işlər naziri Sergey Lavrov Əfqanıstan təhlükəsizlik qüvvələrinin İŞİD və digər terror qruplarına qarşı sərt mübarizə apardığını bildirib. O, Kabulun terrorla mübarizə imkanlarının gücləndirilməsinin region ölkələrinin ümumi maraqlarına uyğun olduğunu deyib.
Redaksiya xəbər verir ki, Lavrov Əfqanıstana maddi-texniki və ekspert dəstəyinin göstərilməsinin vacibliyini vurğulayıb. Onun sözlərinə görə, bu yardım Əfqanıstanın təhlükəsizlik strukturlarının terror təhdidlərinə daha effektiv cavab verməsinə imkan yarada bilər.
Rusiya XİN rəhbəri həmçinin kəşfiyyat xidmətləri və təhlükəsizlik qurumları arasında birbaşa əlaqələrin saxlanılmasını zəruri hesab etdiyini bildirib. Moskva bu əməkdaşlığın sərhədlərarası terrorçuluq və ekstremist qrupların regiondakı fəaliyyətinə qarşı koordinasiyanı gücləndirəcəyini düşünür.
Lavrovun sözlərinə görə, xüsusilə İŞİD-in Əfqanıstandakı fəaliyyəti Mərkəzi Asiya ölkələri və bütövlükdə region üçün təhlükə olaraq qalır. Buna görə Rusiya Kabul ilə təhlükəsizlik sahəsində praktiki əməkdaşlığın genişləndirilməsinin tərəfdarıdır.
Moskva son illərdə Əfqanıstan hakimiyyəti ilə siyasi və təhlükəsizlik təmaslarını artırıb. Rusiya bu münasibətləri əsasən regional sabitlik, terrorla mübarizə və Mərkəzi Asiya istiqamətində mümkün təhlükələrin qarşısının alınması ilə əsaslandırır.