SEPAH-ın yüksək rütbəli zabiti İsmayıl Kosari ABŞ-ın itirdiyi raket və bomba ehtiyatlarını bərpa etməkdə çətinlik çəkəcəyini bildirib.
Redaksiya Fars agentliyinə istinadla xəbər verir ki, Kosari rəqibin son 40 gün ərzində əlindən gələni etdiyini deyib. Onun sözlərinə görə, ABŞ üçün itirilmiş bomba və raket ehtiyatlarını yenidən toplamaq asan olmayacaq.
İranlı zabit bunun əksinə olaraq Tehranın öz hərbi ehtiyatlarını daha rahat şəkildə kompensasiya edə biləcəyini bildirib. O, İranın müdafiə sənayesinin bu baxımdan daha çevik imkanlara malik olduğunu iddia edib.
Kosarinin açıqlaması ABŞ-İran gərginliyi və regionda davam edən hərbi əməliyyatlar fonunda səslənib. Tehran son həftələrdə ABŞ və İsrail mövqelərinə cavab zərbələri endirdiyini bildirir.
ABŞ tərəfi isə İranın raket və dron imkanlarını regional təhlükəsizlik üçün ciddi təhdid kimi qiymətləndirir. Vaşinqton müttəfiqlərinin müdafiəsi və bölgədəki hərbi mövcudluğunu qorumaq üçün əlavə tədbirlər gördüyünü bəyan edir.