Ukraynanın paytaxtı Kiyev Dnepr çayı üzərindəki körpülərin zədələnməsi və nəqliyyat əlaqələrinin pozulması səbəbindən faktiki olaraq iki hissəyə ayrıla bilər. Bu barədə Ukrayna Ali Radasının Nəqliyyat və İnfrastruktur Komitəsinin sədr müavini Vladimir Kreydenko xəbərdarlıq edib.
Redaksiya Ukraynanın “Teleqraf” nəşrinə istinadən xəbər verir ki, deputat noyabrın 10-da verdiyi müsahibədə Rusiya hücumları nəticəsində paytaxtın nəqliyyat infrastrukturunda yaranan problemlərdən danışıb.
Kreydenkonun sözlərinə görə, şəhər rəhbərliyi Dneprin sağ və sol sahilləri arasında nəqliyyat əlaqəsini qorumaq üçün iki müvəqqəti ponton körpü tikməyi planlaşdırır.
Layihəyə ümumilikdə 2,2 milyard qrivna ayrılması nəzərdə tutulur. Bunun 1,2 milyard qrivnası dövlət büdcəsindən, 1 milyard qrivnası isə Kiyev şəhər büdcəsindən maliyyələşdiriləcək.
Deputat bildirib ki, müvəqqəti körpülərin tikintisi təxminən üç-dörd ay çəkə bilər. Onların 2027-ci ilin fevralında və ya martın əvvəlində istifadəyə verilməsi mümkün hesab olunur.
Lakin Kreydenko ponton keçidlərinin mövcud körpüləri tam əvəz edə bilməyəcəyini vurğulayıb.
Hazırda Kiyevin körpülərindən gündə təxminən 600 min avtomobil keçir. Müvəqqəti keçidlər vasitəsilə bu nəqliyyat axınının ən azı yarısını təmin etmək planlaşdırılsa da, deputat iki ponton körpünün gündə 300 min avtomobili qəbul edə biləcəyinə şübhə ilə yanaşır.
Kreydenko əlavə edib ki, elektrik enerjisi təchizatındakı problemlər səbəbindən metronun uzun müddət dayanması vəziyyəti daha da ağırlaşdıra bilər.
Onun sözlərinə görə, əlavə avtobuslar və şəhərətrafı qatarlar metronun daşıdığı sərnişin yükünü tam əvəz etmək imkanına malik deyil.
Deputat xəbərdarlıq edib ki, körpülərə hücumlar davam edərsə və alternativ nəqliyyat marşrutları vaxtında hazırlanmazsa, Kiyevin sağ və sol sahilləri arasında əlaqə ciddi şəkildə məhdudlaşa bilər.
“Belə bir ssenariyə inanmaq istəmirəm. Körpülərin hələ müəyyən dayanıqlıq ehtiyatı var. Əsas məsələ işin düzgün təşkilidir. Əgər şəhər rəhbərliyi və müvafiq nazirlik lazımi tədbirləri görməsə, Kiyev faktiki olaraq iki hissəyə ayrıla bilər”, – deyə Kreydenko bildirib.
O, bunun arzuolunmaz ssenari olduğunu vurğulayaraq zədələnmiş körpülərin operativ yoxlanılmasını və alternativ nəqliyyat sisteminin hazırlanmasını təklif edib.
Eyni zamanda Kiyev və vilayətin bəzi ərazilərində elektrik enerjisinin fövqəladə qrafiklə kəsilməsi barədə məlumatlar yayılıb.
Qeyd edək ki, deputatın xəbərdarlığı Kiyevin inzibati baxımdan iki ayrı şəhərə bölünməsi demək deyil. Söhbət körpülərin və ictimai nəqliyyatın fəaliyyətinin pozulması nəticəsində Dneprin iki sahili arasında nəqliyyat əlaqəsinin kəsilməsi ehtimalından gedir.