İraqın xarici işlər naziri Fuad Hüseyn ABŞ hərbi qüvvələrinin ölkə ərazisindən tamamilə çıxarıldığını açıqlayıb. Onun sözlərinə görə, proses Bağdad və Vaşinqton arasında əvvəlcədən əldə olunmuş razılaşma çərçivəsində həyata keçirilib. Bu barədə İraq rəsmilərinin açıqlamalarına istinadən beynəlxalq media məlumat yayıb.
Redaksiya istinadla xəbər verir ki, ABŞ rəhbərliyindəki beynəlxalq koalisiyanın İraqdakı hərbi missiyasının başa çatdırılması üçün son tarix 30 sentyabr 2026-cı il müəyyən edilmişdi. İraq hökuməti daha əvvəl bu tarixin yekun və dəyişməz olduğunu açıqlamışdı.
ABŞ qüvvələrinin çıxarılması ilə paralel olaraq iki ölkə arasındakı münasibətlərin təhlükəsizlik və hərbi mövcudluq formatından daha çox ikitərəfli iqtisadi və təhlükəsizlik əməkdaşlığı müstəvisinə keçirilməsi nəzərdə tutulur. Sentyabrın 25-də ABŞ Bağdad hava limanındakı diplomatik və logistika mərkəzini də İraq hökumətinə təhvil verib.
İraq rəsmiləri xarici hərbi mövcudluğun başa çatmasından sonra ölkənin təhlükəsizliyinə görə əsas məsuliyyətin İraq qüvvələrinin üzərinə keçəcəyini bildirirlər. ABŞ tərəfi isə İraq təhlükəsizlik qüvvələrinin İŞİD-ə qarşı mübarizədə əsas rolu öz üzərinə götürəcəyini daha əvvəl açıqlamışdı.