Texnologiya milyarderi və Tesla şirkətinin rəhbəri İlon Mask, son günlərdə onun narkotik maddələrdən istifadə etdiyi barədə yayılan iddialarla bağlı açıqlama verib.
Redaksiya xəbər verir ki, The New York Times nəşrinin yayımladığı xəbərdə, Maskın ketamin, ekstazi və halüsinojen göbələk kimi maddələri tez-tez istifadə etdiyi və yanında təxminən 20 müxtəlif dərman olan bir qutu daşıdığı iddia edilib.
Mask, bu iddialara cavab olaraq, sosial media platforması X-də paylaşım edərək, "Narkotik maddə istifadə etmirəm! The New York Times tamamilə yalan danışır" deyə bildirib. O, yalnız bir neçə il əvvəl həkim resepti ilə ketamin qəbul etdiyini və bunun da depressiya müalicəsi məqsədi daşıdığını qeyd edib.
ABŞ prezidenti Donald Tramp isə bu iddialarla bağlı olaraq, Maskın narkotik maddə istifadəsindən xəbərdar olmadığını və onunla bağlı heç bir narahatlığının olmadığını bildirib.
Bu iddialar, Maskın rəhbərlik etdiyi Tesla və SpaceX kimi şirkətlərin gələcəyi və ictimai imici baxımından suallar doğurur. Bəzi investorlar və iş ortaqları, bu vəziyyətin şirkətlərin nüfuzuna və fəaliyyətinə təsirindən narahat olduqlarını ifadə ediblər.
Sevinc Kərimova