Google və Unity süni intellekt əsaslı oyun yaratma platformaları üzrə strateji əməkdaşlıq elan edib. Tərəfdaşlıq çərçivəsində Google Playground artıq istifadəyə verilib, Unity Spark isə ilin sonuna doğru daha geniş imkanlarla təqdim olunacaq. Bu barədə Google və Unity məlumat yayıb.
Redaksiya istinadla xəbər verir ki, Playground istifadəçilərə yalnız mətnlə təsvir verməklə oynanıla bilən oyunlar yaratmağa imkan verir. Platformada proqramlaşdırma biliyi tələb olunmur və istifadəçi sonradan personajları, qaydaları, oyun mexanikasını və digər elementləri dəyişə bilər.
Google bildirir ki, Playground hazırda ABŞ-da 18 yaşdan yuxarı istifadəçilər üçün açıqdır. Platformada multiplayer, lider cədvəlləri və icma funksiyaları da mövcuddur. Bəzi imkanların və yaradıcı limitlərin Google One abunəliyindən asılı olaraq mərhələli şəkildə təqdim edildiyi qeyd olunur.
Unity Spark isə Playground-un daha inkişaf etmiş davamı kimi hazırlanır. O, Unity mühərrikinin imkanlarından istifadə edəcək, yüksək keyfiyyətli 3D mexanika və daha peşəkar oyun qurma alətləri təqdim edəcək. Sistem birbaşa Unity Asset Store ilə inteqrasiya olunacaq və istifadəçilərə minlərlə hazır, rəssamlar tərəfindən yaradılmış assetdən istifadə etməyə imkan verəcək.
Unity-nin məlumatına görə, Spark hazırda sınaq mərhələsindədir və qapalı beta versiyası yaxın zamanda başlayacaq. Şirkət bunun sadəcə bir promtla hazır oyun çıxaran sistem olmadığını, istifadəçiyə layihəni mərhələli şəkildə qurmaq, dəyişmək və təkmilləşdirmək imkanı verən yaradıcı mühit olduğunu vurğulayır.
Sosial mediada yayılan “artıq kod ümumiyyətlə lazım olmayacaq” fikri isə rəsmi açıqlamalardan daha sərt ifadədir. Playground həqiqətən kodsuz oyun yaratmağa imkan verir, lakin Unity Spark peşəkar oyun hazırlığını tamamilə proqramlaşdırmadan azad edən sistem kimi təqdim edilmir.
Google və Unity-nin yeni platformaları oyun istehsalına giriş baryerini əhəmiyyətli dərəcədə azaltmağı və əvvəllər oyun mühərrikləri ilə işləməyən istifadəçiləri də bu sahəyə cəlb etməyi hədəfləyir.