Google şirkəti Linux əməliyyat sisteminin ARM64 arxitekturasına malik qurğuları üçün Chrome brauzerinin buraxılacağını elan edib. Bu yenilik 2026-cı ilin ikinci rübündə istifadəçilərə təqdim olunacaq.
Redaksiya xəbər verir ki, bu addım Google-ın ARM arxitekturalı cihazlar üçün brauzer dəstəyini genişləndirmək səylərinin bir hissəsidir. Qeyd edək ki, Chrome artıq 2020-ci ildə ARM əsaslı Mac kompüterləri üçün, 2024-cü ildə isə Windows on Arm platforması üçün istifadəyə verilmişdi.
Şirkətdən verilən məlumata görə, bu qərar Chromium layihəsinin açıq mənbəli üstünlüklərini Google ekosisteminin tətbiqləri və xüsusiyyətləri ilə birləşdirən brauzer təcrübəsinə artan tələbatı qarşılamaq məqsədi daşıyır. Hələlik, bu tələbatın mövcud vəziyyətdənmi, yoxsa gələcəkdə yaranacaq ehtiyacdanmı qaynaqlandığı tam aydın deyil.