Google şirkəti Azərbaycanda yeni, süni intellekt əsaslı danışıqla işləyən axtarış xidmətini istifadəyə verib. Bu yenilik istifadəçilərə Google Axtarışı ilə real vaxt rejimində söhbət aparmağa imkan tanıyır. Xidmət hazırda Azərbaycan dilini tam dəstəkləyir və bu dildə istifadə edilə bilər.
Redaksiya məlumat verir ki, "Search Live" xüsusiyyətinə Android və ya iOS əməliyyat sistemli mobil qurğularda quraşdırılmış Google tətbiqi vasitəsilə daxil olmaq mümkündür. İstifadəçilər mobil cihazlarında Google tətbiqini açdıqdan sonra əsas axtarış sətri altında yerləşən "Live" ikonuna toxunaraq söhbətə başlaya bilərlər. Söhbət zamanı istifadəçilər təbii şəkildə suallar verə, söhbəti yarımçıq kəsə, əlavə suallar soruşa və ya mövzunu dəyişə bilərlər. Ətraf mühitdə gördükləri əşyalar haqqında suallar vermək üçün kamera funksiyasından istifadə etmək istəyənlər isə "Video" düyməsindən istifadə edə bilərlər.
Bu yeni xidmətin əsas imkanları arasında səslə və ya video vasitəsilə sual vermək, real vaxt rejimində kömək almaq (məsələn, ideya yoxlama, təşkilatlanma və ya məlumatların xülasəsini çıxarmaq) yer alır. Süni intellekt modelləri, xüsusilə Gemini, Azərbaycan dilini tam dəstəkləyir ki, bu da yerli istifadəçilər üçün xidmətin səmərəliliyini artırır.