Azərbaycan ilə Avropa Komissiyası arasındakı çoxtərəfli münasibətlərin kifayət dərəcədə yeni, lakin strateji baxımdan ən perspektivli hissəsi bərpaolunan enerji sektoru ilə bağlıdır. Qlobal iqlim dəyişiklikləri və dünyada alternativ enerjiyə yaranan tələbat fonunda, Azərbaycan özünün zəngin karbohidrogen ehtiyatları ilə yanaşı, həm də nəhəng "yaşıl enerji" layihələrinin mərkəzinə çevrilməkdədir. Azərbaycan Respublikasının Prezidenti cənab İlham Əliyevlə Avropa Komissiyasının Prezidenti xanım Ursula Fon der Lyayen arasında bu günlərdə paytaxtımızda keçirilən görüşdə Azərbaycanın günəş, külək və su elektrik enerjisi potensialı, həmçinin bu enerjinin Avropa bazarlarına ötürülməsi üçün artıq mövcud olan logistik ötürmə xətləri və gələcəkdə tikilməsi planlaşdırılan yeni xətlər geniş şəkildə müzakirə mövzusu olmuşdur. Bu sahədə Azərbaycan regional liderliyini hüquqi öhdəliklərlə möhkəmləndirib.
Ölkə başçısı bəyanatında indiyədək dünyanın aparıcı xarici və yerli investisiya şirkətləri ilə imzalanmış rəsmi müqavilələr ölkəmizə növbəti beş və ya altı il ərzində səkkiz giqavat (8 GW) həcmində Günəş və külək enerjisi istehsal etmək imkanı verəcəyi barədə konkret fikirlər səsləndirdi. Dövlət başçısının vurğuladığı kimi, bu rəqəmlər yalnız artıq imzalanmış və müqavilə öhdəliyi daşıyan layihələrə aiddir. Potensial isə qat-qat böyükdür və birmənalı olaraq gələcəkdə daha çox həcmlər dövriyyəyə buraxılacaqdır. Beləliklə, Bakı və Brüssel ənənəvi enerji tərəfdaşlığını uğurla yaşıl enerji platformasına köçürərək strateji müttəfiqliyin yeni modelini yaradırlar.
Zəminə Abbasova;
Neftçala rayonu