Fişli (plug-in) hibrit avtomobillər kağız üzərində yüksək yanacaq qənaəti təklif etsə də, real istifadə məlumatları bu vəziyyətin əksəriyyət hallarda belə olmadığını göstərir. Fraunhofer İnstitutunun tədqiqatçıları, "OBFCM" sistemindən istifadə edərək 2021-2023-cü illər arasında istehsal edilmiş 981.035 ədəd şarj edilə bilən hibrit avtomobilin real istifadə məlumatlarını təhlil ediblər.
Redaksiya məlumat verir ki, aparılan təhlillər şarj edilə bilən hibrit avtomobil sahiblərinin rəsmi göstəricilərdən təxminən üç dəfə çox yanacaq sərf etdiyini ortaya qoyur. Rəsmi məlumatlara görə, orta hesabla bir şarj edilə bilən hibrit avtomobil üçün 1,57 litr yanacaq istehlakı (WLTP testləri əsasında) qeyd olunur. Lakin real sürüş şəraitində bu göstərici 6,12 litrə qədər yüksəlir.
Tədqiqatçılar qeyd edirlər ki, avtomobilin əsasən batareya gücü ilə hərəkət etdiyi rejimdə belə, yanacaq istehlakı 100 kilometrə orta hesabla 2,98 litr təşkil edir. Bu rəqəm, rəsmi olaraq açıqlanan birləşdirilmiş göstəricidən demək olar ki, iki dəfə yüksəkdir. Bəzi fişli hibrit avtomobillərin (xüsusilə müəyyən Porsche modellərinin) daha yüksək yanacaq istehlakına malik olduğunu vurğulayan tədqiqatçılar, bu tip avtomobil istifadəçilərinin nəqliyyat vasitələrini tənzimləyici orqanların və ya şirkətlərin proqnozlaşdırdığı qədər tez-tez şarj etmədiklərini və buna görə də real istehlakın fərqləndiyini bildirirlər.