Elon Maskın rəhbərlik etdiyi X platformu ilə Avropa İttifaqı arasında yaşanan qarşıdurma yeni bəyanatlar və qarşılıqlı ittihamlarla daha da güclənib. Maskın açıqlamaları sosial media məkanında geniş müzakirələrə səbəb olub və prosesin siyasi çalarları daha da kəskinləşib.
Redaksiya xəbər verir ki, Elon Mask Avropa Komissiyasının X platformuna “gizli və qanunsuz” razılaşma təklif etdiyini bildirib. Maskın iddiasına görə, təklif platformanın ifadə azadlığını səssiz şəkildə məhdudlaşdırması müqabilində cərimələrin tətbiq edilməyəcəyini nəzərdə tuturdu. O, Avropa İttifaqını “bürokratik mexanizm” adlandıraraq, suverenliyin üzv dövlətlərə qaytarılmalı olduğunu vurğulayıb.
ABŞ senatoru Marko Rubio Avropa Komissiyasının tətbiq etdiyi maliyyə sanksiyasını Amerika texnologiya şirkətlərinə və ABŞ vətəndaşlarına qarşı hücum kimi qiymətləndirib. ABŞ-ın Aİ yanındakı səfiri isə cəriməni “tənzimləmə həddini aşan addım” kimi dəyərləndirib və ABŞ prezidenti Donald Tramp administrasiyasının senzura praktikasına qarşı açıq mövqe tutduğunu bildirib.
Məlumata görə, digər sosial media platformaları Avropa Komissiyasının təklifini qəbul etsə də, X platforması bu şərtlərə razı olmayıb. Braziliya, Avstraliya və Kanadada tətbiq olunan cərimələrə baxmayaraq X rəhbərliyi mövqeyindən geri çəkilmədiyini qeyd edib. Platformanın Avropa İttifaqı ölkələrində ən çox istifadə olunan xəbər mənbələrindən biri olduğu bildirilir.
Siyasi ekspertlər hesab edir ki, Aİ-nin X platformasına qarşı tətbiq etdiyi cərimələr regional tənzimləmələr, ifadə azadlığı və beynəlxalq texnologiya siyasəti ilə bağlı yeni müzakirələr doğuracaq. Tərəflər arasında mövcud qarşıdurmanın yaxın zamanda azalacağına dair əlamətlər görünmür.