Dil öyrənmə platforması Duolingo, bir çox müqaviləli əməkdaşının vəzifələrini süni intellekt sistemləri ilə əvəz etdiyini açıqlayıb.
Redaksiya xəbər verir ki, bu qərar birbaşa şirkətin baş direktoru Luis von Ahn tərəfindən əməkdaşlara göndərilən daxili e-mail vasitəsilə çatdırılıb.
Luis von Ahn e-maildə qeyd edib ki, şirkət bu dəyişikliklə daha məhsuldar və çevik işləməyi, eyni zamanda texnoloji yeniliklərə uyğunlaşmanı hədəfləyir. Xüsusilə məzmun yazarlığı, dil məşqlərinin hazırlanması və tədris tapşırıqlarının tərtibi sahələrində çalışan müqaviləli işçilərin vəzifələri artıq süni intellekt alqoritmləri ilə yerinə yetiriləcək.
Şirkət bildirib ki, işdən çıxarılan əməkdaşlara keçid dəstəyi və uyğun resurslar təqdim olunub. Von Ahn vurğulayıb ki, bu addım emosional baxımdan asan olmasa da, Duolingo-nun uzunmüddətli vizyonu üçün vacibdir.
Ekspertlər bu qərarı süni intellektin əmək bazarına real təsirinin daha bir nümunəsi kimi qiymətləndirir. Duolingo-nun bu istiqamətdə ilk böyük texnoloji transformasiya addımı digər texnoloji startaplara da nümunə ola bilər.
Fərid Əlizadə