Citigroup-un direktorlar şurası bankın Rusiyadakı son əsas aktivlərindən biri olan AO Citibank-ın satılmasını təsdiqləyib. Sövdələşmə çərçivəsində aktivlərin Rusiyalı investorlar tərəfindən alınması nəzərdə tutulur və satış prosesi 2026-cı ilin ilk yarısında tamamlanmalıdır. Bu qərar bankın Rusiya bazarından tam çıxış strategiyasının bir hissəsidir.
Redaksiya xəbər verir ki, Citigroup bu satışla əlaqədar təxminən 1,2 milyard dollar həcmində zərər qeydə alacağını açıqlayıb. Zərər əsasən valyuta məzənnələri və aktivlərin balansdan çıxarılması ilə bağlı olacaq və 2025-ci ilin son rübünün maliyyə hesabatlarında əksini tapacaq.
Şirkət bildirir ki, sövdələşmə Citigroup-un ümumi kapital mövqeyinə ciddi təsir göstərməyəcək. Bank rəhbərliyi bu addımın beynəlxalq risklərin azaldılması və qlobal fəaliyyətin optimallaşdırılması məqsədi daşıdığını vurğulayır.