Çin hökuməti ABŞ-ın Fələstinlə bağlı sanksiya tətbiq etmə qərarını tənqid edib.
Redaksiya xəbər verir ki, rəsmi Pekin bu addımı "məyusedici" adlandıraraq, Vaşinqtonu Fələstin məsələsində ədalətli və balanslı mövqe sərgiləməyə çağırıb. Çin XİN-dən verilən açıqlamada qeyd olunub: “ABŞ-ın Fələstinlə bağlı sanksiya qərarını dərin narahatlıq və məyusluqla qarşılayırıq. Belə yanaşmalar regionda vəziyyəti daha da gərginləşdirə bilər.”
Çin tərəfi beynəlxalq hüquqa və BMT qətnamələrinə əsaslanaraq, Fələstin xalqının hüquqlarının qorunmasının vacibliyini vurğulayıb. Pekin, tərəflər arasında dialoq və diplomatik həll yollarının təşviq edilməsinin yeganə çıxış yolu olduğunu bəyan edib.
Bu bəyanat, son aylarda artan gərginlik və Qəzza zolağındakı humanitar böhran fonunda verilib. Çin daha əvvəl də Fələstin məsələsində iki dövlətli həll modelini dəstəklədiyini bildirmişdi.
Sevinc Kərimova