Bosniya və Herseqovinada Avropa İttifaqının EUFOR hərbi missiyasına məxsus helikopter qəzaya uğrayıb. Hadisə nəticəsində 4 nəfər həyatını itirib, daha 11 nəfər yaralanıb. Ölənlərin və yaralananların hamısı İtaliya vətəndaşlarıdır. Bu barədə Reuters agentliyi İtaliya Müdafiə Nazirliyinə istinadən məlumat yayıb.
Redaksiya mənbəyə istinadən xəbər verir ki, qəza oktyabrın 29-da ölkənin şimalındakı Brçko bölgəsinin Qoritsa yaşayış məntəqəsi yaxınlığında baş verib. İtaliyaya məxsus CH-47 Chinook hərbi nəqliyyat helikopteri planlı təlim uçuşu zamanı yerə çırpılıb.
İtaliya Müdafiə Nazirliyinin məlumatına görə, helikopterin göyərtəsində ümumilikdə 15 nəfər olub. Həlak olanlardan ikisi İtaliya ordusunun hərbçisi, digər ikisi isə İtaliya Qızıl Xaçının Könüllü Hərbi Korpusunun üzvüdür.
Qəza zamanı yaralanan 11 nəfər xəstəxanaya yerləşdirilib. EUFOR-un açıqlamasına əsasən, yaralılardan ikisi Tuzla şəhərindəki tibb müəssisəsinə köçürülüb, digər doqquz nəfərin müalicəsi isə Brçkoda davam etdirilir. Onların vəziyyəti stabildir və heç birinin həyatı üçün təhlükə olmadığı bildirilir.
Hadisə yerinə yerli təcili yardım və xilasetmə xidmətləri cəlb olunub. Qəza nəticəsində mülki şəxslər arasında xəsarət alan olmayıb, yaşayış obyektlərinə və mülki infrastruktura ziyan dəyməyib.
İtaliyanın müdafiə naziri Quido Krozetto və Baş nazir Corca Meloni həlak olanların ailələrinə başsağlığı veriblər.
EUFOR komandanlığı qəzanın səbəblərinin müəyyənləşdirilməsi üçün geniş araşdırmaya başlanıldığını açıqlayıb. Helikopterin hansı səbəbdən qəzaya uğradığı hələlik məlum deyil.
Qeyd edək ki, Avropa İttifaqının EUFOR Althea hərbi missiyası 2004-cü ildən Bosniya və Herseqovinada fəaliyyət göstərir. Missiyanın əsas vəzifəsi ölkədə təhlükəsizliyin və Deyton Sülh Sazişinin hərbi müddəalarının icrasının təmin edilməsinə dəstək verməkdir.