Fransada etirazlara görə 70 min təhlükəsizlik əməkdaşı səfərbər ediləcək

Fransada etirazlara görə 70 min təhlükəsizlik əməkdaşı səfərbər ediləcək

Sevinc Kərimova · Media ·

Fransa hakimiyyəti oktyabrın 31-də, Hellouin bayramı günü keçiriləcək kütləvi etiraz aksiyaları ilə əlaqədar ölkə üzrə 70 min polis və jandarm əməkdaşını səfərbər edəcək. Hakimiyyət nümayəndələri həmin gün ictimai asayişin ciddi şəkildə pozulması ehtimalından narahatdırlar. Bu barədə Reuters agentliyi məlumat yayıb.

Redaksiya mənbəyə istinadən xəbər verir ki, Fransanın daxili işlər naziri Loran Nünyes oktyabrın 31-ni ictimai təhlükəsizlik baxımından “çox yüksək riskli gün” adlandırıb. Nazir bildirib ki, müxtəlif radikal qruplar sosial şəbəkələr vasitəsilə insanları küçələrə çıxmağa və iğtişaşlar törətməyə çağırırlar.

Nünyesin sözlərinə görə, xüsusilə axşam saatlarında vəziyyətin gərginləşməsi ehtimalı yüksəkdir. Əsas etiraz nümayişləri başa çatdıqdan sonra radikal qrupların yeni toplaşmalar təşkil edə biləcəyi bildirilir.

Nazir qeyd edib ki, həmkarlar ittifaqları, radikal solçu qruplar və “Sarı jiletlilər” hərəkatının bəzi radikal tərəfdarları oktyabrın 31-də saat 20:00-dan etibarən Fransanın müxtəlif şəhərlərində küçə aksiyalarına çağırışlar edirlər.

“Oktyabrın 31-i ictimai asayiş üçün çox yüksək risk daşıyan gündür”, – deyə daxili işlər naziri vurğulayıb.

Nünyes xəbərdarlıq edib ki, polis zorakılıq hallarına və qanun pozuntularına qarşı son dərəcə sərt tədbirlər görəcək.

Fransa Daxili İşlər Nazirliyinin məlumatına görə, oktyabrın 24-də ölkə üzrə keçirilən etiraz aksiyalarında təxminən 410 min nəfər iştirak edib. Həmin gün də təhlükəsizliyin təmin olunması üçün 70 min polis və jandarm əməkdaşı səfərbər edilmişdi.

Rəsmilər bildirirlər ki, genişmiqyaslı təhlükəsizlik tədbirləri oktyabrın 17-də bir sıra şəhərlərdə qeydə alınan talan və vandalizm hallarının təkrarlanmasının qarşısını almağa kömək edib.

Bu arada həmkarlar ittifaqları və tələbə təşkilatları oktyabrın 31-də yeni nümayişlər keçirməyə, noyabrın 5-də isə ümummilli tətil təşkil etməyə çağırırlar.

Etirazçıların əsas tələbləri əməkhaqlarının artırılması, yaşayış xərclərinin yüksəlməsinə qarşı tədbirlər görülməsi və dövlət xidmətlərində mövcud problemlərin həll edilməsidir.

Fransa hakimiyyəti etirazların miqyasının genişlənməsi və sosial narazılığın müxtəlif əhali qruplarını əhatə etməsi fonunda təhlükəsizlik tədbirlərini gücləndirir.