Microsoft-un həmtəsisçisi Bill Qeyts növbəti pandemiyanın COVID-19-dan daha ağır nəticələrə səbəb ola biləcəyini bildirib. O, dünyada səhiyyə sistemlərinin yeni qlobal epidemiya risklərinə qarşı daha hazırlıqlı olması lazım olduğunu vurğulayıb.
Redaksiya CNBC və Decider-ə istinadla xəbər verir ki, Qeyts növbəti 25 il ərzində daha ciddi pandemiyanın baş verməsinin mümkün olduğunu deyib. Onun sözlərinə görə, COVID-19 dünyaya qlobal səhiyyə hazırlığının nə qədər zəif olduğunu göstərdi.
Qeyts bildirib ki, gələcək pandemiyanın fərqli patogendən qaynaqlanması mümkündür və belə virus daha sürətli yayıla, daha ağır sosial-iqtisadi nəticələr yarada bilər. O, hökumətləri epidemioloji izləmə, peyvənd istehsalı və erkən xəbərdarlıq sistemlərinə daha çox sərmayə qoymağa çağırıb.
Microsoft-un həmtəsisçisi hesab edir ki, növbəti pandemiyanın qarşısını tam almaq mümkün olmasa da, onun təsirlərini azaltmaq mümkündür. Bunun üçün vaksinlərin daha qısa müddətdə hazırlanması, qlobal səhiyyə əməkdaşlığının gücləndirilməsi və tibbi təchizat zəncirlərinin daha dayanıqlı qurulması vacib sayılır.