“Anthropic”in qabaqcıl süni intellekt sistemi geniş istifadə olunan proqram təminatlarında minlərlə təhlükəsizlik boşluğu aşkarlayıb. Şirkət bildirir ki, Sİ artıq proqram xətalarını tapmaqda o qədər sürətlənib ki, əsas problem onların aşkarlanması deyil, insanlar tərəfindən yoxlanılması və aradan qaldırılmasıdır. Bu barədə “Anthropic” məlumat yayıb.
Redaksiya istinadla xəbər verir ki, “Claude Mythos Preview” açıq mənbəli proqram layihələrində 23 mindən çox mümkün boşluq müəyyən edib. Xarici kibertəhlükəsizlik şirkətlərinin yoxladığı namizədlərin təxminən 91 faizi həqiqi təhlükəsizlik problemi kimi təsdiqlənib. Mayın 22-dək 1596 boşluq proqram təminatının yaradıcılarına açıqlanıb, onlardan 97-si aradan qaldırılıb.
“Anthropic”in “Project Glasswing” təşəbbüsü çərçivəsində sistem təxminən 50 tərəfdaşın mühüm proqram infrastrukturunu təhlil edərək 10 mindən çox yüksək və kritik təhlükəli boşluq tapıb. Şirkət daha sonra layihəni 15-dən çox ölkədə fəaliyyət göstərən əlavə 150 təşkilata genişləndirməyə qərar verib.
Model “Mozilla” ilə əməkdaşlıq zamanı iki həftə ərzində “Firefox” brauzerində 22 boşluq aşkarlayıb. Onlardan 14-ü yüksək təhlükəli hesab olunub. Bu göstərici 2025-ci ildə “Firefox”da aradan qaldırılan bütün yüksək təhlükəli boşluqların təxminən beşdə birinə bərabərdir.
Şirkət xəbərdarlıq edir ki, boşluqların bu sürətlə tapılması mövcud 90 günlük açıqlama və yeniləmə qaydalarını çətin vəziyyətə sala bilər. Minlərlə nəticənin insan ekspertlər tərəfindən yoxlanılması, proqram yaradıcılarına düzgün formada çatdırılması və vaxtında bağlanması hazırda prosesin ən ləng mərhələsinə çevrilib.