Ukrayna Prezidenti Volodimir Zelenski Rusiya ordusunun Raduşne yaşayış məntəqəsinə hücum zamanı Şimali Koreya istehsalı olan ballistik raketdən istifadə etdiyini bildirib. O, bunun ilkin qiymətləndirmə olduğunu və raketin mənşəyinin araşdırıldığını vurğulayıb. Bu barədə Reuters məlumat yayıb.
Redaksiya istinadla xəbər verir ki, Ukrayna tərəfinin ilkin məlumatına əsasən, raketin uçuş trayektoriyası Şimali Koreyanın KN-23 və ya KN-24 tipli qısa mənzilli ballistik raketlərinin göstəricilərinə uyğun gəlib. Mütəxəssislər raketin qalıqlarını araşdıraraq onun dəqiq modelini və istehsal ölkəsini müəyyənləşdirməyə çalışırlar.
Zelenski Moskva ilə Pxenyan arasındakı əməkdaşlığın raket tədarükü və Şimali Koreya hərbçilərinin Rusiya ərazisində yerləşdirilməsini əhatə etdiyini iddia edib. O, bu əməkdaşlığın Ukrayna və Avropanın təhlükəsizliyinə birbaşa təhdid yaratdığını bildirib.
Raduşne kəndinə endirilən zərbə nəticəsində eyni ailənin beş üzvünün, o cümlədən üç uşağın öldüyü bildirilir. Ukrayna hakimiyyəti raketin Şimali Koreya mənşəli olduğuna dair yekun nəticənin ekspertizadan sonra açıqlanacağını qeyd edib.