Süni intellekt şirkəti Anthropic ilkin kütləvi səhm təklifinə hazırlaşarkən maliyyə göstəriciləri və gələcək xərcləri ilə bağlı yeni məlumatlar açıqlanıb. Şirkət 2025-ci ildə 42 milyard dollar xalis zərər qeydə alıb. Bunun təxminən 34 milyard dolları gələcəkdə Anthropic səhmlərinə çevrilə biləcək maliyyə alətlərinin yenidən qiymətləndirilməsi ilə bağlı mühasibat xərclərinin payına düşüb. Bu barədə şirkətin IPO prospekti ilə tanış olan Reuters məlumat yayıb.
Redaksiya istinadla xəbər verir ki, Anthropic-un 2025-ci ildə gəlirləri 12 dəfə artaraq təxminən 4,6 milyard dollara çatıb. Bununla belə, şirkətin əməliyyat zərəri 8 milyard dolları keçib. Hesablama resursları və infrastruktur üçün xərclər isə ötən il 7,33 milyard dollar təşkil edib.
Reuters-in gördüyü sənədlərə əsasən, Anthropic gələcək illər üçün bulud infrastrukturu və hesablama gücləri üzrə ümumilikdə 518 milyard dollarlıq öhdəliklər götürməyi planlaşdırır. Bu rəqəm təkcə 2027-ci ilin xərci kimi deyil, gələcək dövr üzrə genişmiqyaslı infrastruktur öhdəlikləri kimi təqdim olunur.
Şirkət IPO zamanı 2 trilyon dollardan artıq qiymətləndirməyə nail olmağı hədəfləyir. Anthropic-un 2026-cı ilin mayında qiymətləndirilməsi təxminən 965 milyard dollar olub. Planlaşdırılan yerləşdirmə baş tutarsa, bu, süni intellekt sektorunda ən iri IPO-lardan birinə çevrilə bilər.