ABŞ-ın əsas televiziya şəbəkələri Prezident Donald Trampın iştirakı ilə keçirilən tədbirlərin birgə televiziya çəkilişlərini bərpa edir. ABC, CBS, Fox News və NBC Ağ Ev press-poolundakı növbəli işlərinə geri qayıdacaqlar. Bu barədə The New York Times məlumat yayıb.
Redaksiya istinadla xəbər verir ki, telekanallar daha əvvəl CNN-in Ağ Evdəki press-pool növbəsinə buraxılmamasından sonra Trampın tədbirləri üçün birgə video çəkilişlərini dayandırmışdılar. Bu sistemdə əsas televiziya şəbəkələri növbə ilə prezidentin tədbirlərini çəkir və görüntüləri digər media qurumları ilə paylaşırlar.
CNN, MS NOW və POLITICO jurnalistlərinin Ağ Evə girişinə qoyulan qadağa federal məhkəmənin müvəqqəti qərarından sonra aradan qaldırılıb. Bundan sonra televiziya press-poolu da fəaliyyətini yenidən bərpa edib.
Növbə CNN-ə çatdıqda və Ağ Ev həmin şəbəkənin çəkiliş heyətinə yenidən mane olarsa, digər telekanallar CNN-i əvəz etmək üçün başqa çəkiliş qrupunun göndərilib-göndərilməməsi barədə ayrıca qərar verəcəklər.
Tramp sentyabrın 18-də CNN, MS NOW və POLITICO-nu özü və administrasiyası haqqında saxta xəbərlər yaymaqda ittiham edərək həmin media qurumlarının Ağ Evə girişinin məhdudlaşdırıldığını açıqlamışdı. Media qurumları isə qərarın mətbuat azadlığını pozduğunu bildirərək məhkəməyə müraciət etmişdilər.