ABŞ-ın maliyyə naziri Skott Bessentin İrandan gəldiyi iddia olunan sui-qəsd təhdidləri səbəbindən yaşadığı evi tərk edərək hərbi bazaya köçdüyü bildirilir. Bu barədə “The New York Times” qəzeti məsələdən məlumatlı üç mənbəyə istinadən xəbər yayıb.
Redaksiya Reuters agentliyinə istinadən xəbər verir ki, ABŞ rəsmiləri son həftələrdə İranın hazırkı və keçmiş amerikalı dövlət məmurlarına qarşı mümkün hücum planlarının daha ciddi mərhələyə keçdiyi qənaətinə gəliblər.
Nəşrin məlumatına görə, Bessentin həyatına qarşı yönəlmiş təhdidlərin nə dərəcədə ciddi olduğu hələlik tam aydın deyil. Bununla belə, təhlükəsizlik narahatlıqları onun daha güclü mühafizə olunan əraziyə köçürülməsinə səbəb olub.
Reuters-in oktyabr ayında tanış olduğu kəşfiyyat sənədində də İranın amerikalı rəsmilərə qarşı mümkün hücum hazırlıqlarının irəlilədiyi barədə xəbərdarlıq edilib.
ABŞ rəsmiləri eyni zamanda İranın Amerika ərazisində və digər xarici ölkələrdə genişmiqyaslı hücumlar həyata keçirmək imkanlarının məhdud olduğunu bildirirlər.
Tehran isə daha əvvəl ABŞ ərazisində dövlət rəsmilərinə və digər şəxslərə qarşı hücum planlaşdırması barədə ittihamları rədd edib.
Məlumata əsasən, Bessent təhlükəsizlik səbəbindən hərbi obyektə köçən ilk yüksəkvəzifəli ABŞ rəsmisi deyil.
Ötən il azı altı yüksəkvəzifəli administrasiya nümayəndəsi hərbi bazalara və ya mühafizə olunan yaşayış məkanlarına yerləşdirilib. Onların arasında Ağ Evin aparat rəhbəri Stiven Miller və keçmiş baş prokuror Pem Bondi də olub.
Lakin həmin şəxslərin hamısının köçürülməsinin İranla əlaqəli təhdidlərdən qaynaqlandığı təsdiqlənməyib.
Skott Bessent ABŞ-ın İrana qarşı iqtisadi təzyiq siyasətinin əsas icraçılarından biridir. O, avqustun 24-də Vaşinqtonun “İqtisadi təcrid” əməliyyatının gücləndiriləcəyini açıqlamışdı.
Maliyyə naziri həmin vaxt İranın beynəlxalq maliyyə sistemindən təcrid edilməsinə və İslam İnqilabı Keşikçiləri Korpusunun maliyyə mənbələrinin məhdudlaşdırılmasına yönəlmiş tədbirlərin davam etdiriləcəyini bildirmişdi.
ABŞ Maliyyə Nazirliyinin nümayəndəsi “The New York Times” qəzetinə açıqlamasında Bessentin İranla əlaqələndirilən təhdidlərdən çəkinməyəcəyini və Tehrana qarşı iqtisadi təzyiq siyasətini davam etdirəcəyini söyləyib.
Bununla belə, nazirin konkret hansı hərbi bazada yerləşdirildiyi barədə məlumat açıqlanmayıb.
Hazırda Bessentə qarşı sui-qəsd planının mövcudluğu və onun hansı mərhələdə olduğu barədə bütün iddiaları müstəqil şəkildə təsdiqləmək mümkün deyil.