ABŞ-nin BMT-dəki nümayəndəsi Mayk Uolts Venesuelada mövcud hakimiyyətin legitimliyini tanımadıqlarını bəyan edib. Onun sözlərinə görə, Nikolas Maduro və ətrafı qanunsuz şəkildə hakimiyyəti ələ keçirib və seçkilərin nəticələri oğurlanıb.
Redaksiya xəbər verir ki, Mayk Uolts Qərb yarımkürəsi üçün ən ciddi təhlükənin transmilli terrorçu və cinayətkar qruplardan qaynaqlandığını bildirib. O vurğulayıb ki, narkokartellər yüksək texniki imkanlara, geniş maliyyə resurslarına malikdir və regionda ciddi sabitlik pozuntuları yaradır.
Diplomatın fikrincə, bu qruplar ənənəvi cinayət şəbəkələrindən fərqli olaraq daha mürəkkəb və təşkilatlanmış struktura sahibdir. Onların fəaliyyəti təhlükəsizlik, iqtisadiyyat və ictimai sabitlik üçün birbaşa təhdid yaradır.
Mayk Uolts əlavə edib ki, ABŞ prezidenti Donald Tramp narkokartellərə qarşı mübarizədə ölkənin bütün imkanlarından istifadə ediləcəyini açıq şəkildə bəyan edib. ABŞ administrasiyası bu şəbəkələrin tam zərərsizləşdirilməsini prioritet məqsəd kimi müəyyənləşdirir.