ABŞ administrasiyası kritik minerallar və nadir torpaq elementlərinin ölkə daxilində hasilatı və emalını artırmaq üçün yeni layihələri sürətləndirməyə çalışır. Bu barədə South China Morning Post sənaye nümayəndələri və ekspertlərə istinadən məlumat yayıb.
Redaksiya istinadla xəbər verir ki, Patriot Critical Minerals şirkətinin rəhbəri Brodi Sazerlend administrasiyanın yerli istehsal layihələrinə fəal dəstək verdiyini bildirib. Onun şirkəti Nevada ştatında volfram mədənini yenidən açmağa çalışır və ABŞ Müdafiə Nazirliyi ilə Energetika Nazirliyindən dəstək almaq üçün müraciət edib.
Məlumata görə, kritik mineral sektoruna indiyədək təxminən 18,6 milyard dollar dövlət vəsaiti yönəldilib. Bununla belə, ekspertlər sərmayələrin hələ geniş və sabit təchizat zəncirinə çevrilmədiyini, sektorda çoxsaylı layihələrin maliyyə və texniki çətinliklərlə üzləşdiyini bildirirlər.
Əsas problem Çinin qlobal nadir torpaq elementlərinin emalı və təmizlənməsi sahəsində təxminən 90 faizlik paya sahib olmasıdır. ABŞ istehsalçılarının məhsullarının bəzi hallarda Çinlə müqayisədə iki-beş dəfə baha başa gəldiyi qeyd olunur.
Çin 2023-cü ildən etibarən bir sıra kritik mineralların ixracına nəzarəti sərtləşdirib. Bu addımlar ABŞ-nin ticarət və texnologiya məhdudiyyətləri fonunda Pekinlə Vaşinqton arasında strateji rəqabətin mühüm istiqamətlərindən birinə çevrilib.
ABŞ üçün əsas məqsəd müdafiə sənayesində istifadə olunan kritik mineralların xarici mənbələrdən asılılığını azaltmaqdır. Lakin yerli hasilat və emal güclərinin genişləndirilməsi daha yüksək xərclərə səbəb ola və həm dövlət satınalmalarında, həm də mülki sənayedə qiymətləri artıra bilər.