ABŞ Konqresinin Nümayəndələr Palatası müharibə naziri Pit Heqsetə qarşı impiçment təşəbbüsünün irəliləməsini bloklayıb. Ağ Ev təşəbbüsü siyasi motivli addım adlandıraraq Pentaqon rəhbərinə dəstəyini ifadə edib.
Redaksiya Ağ Evin rəsmi bəyanatına və Associated Press agentliyinə istinadən xəbər verir ki, noyabrın 10-da Nümayəndələr Palatasında keçirilən səsvermə nəticəsində impiçment qətnaməsinin müvafiq komitəyə göndərilməsi qərara alınıb.
Qərar 211 lehinə, 204 əleyhinə səslə qəbul edilib. Bu addım Heqsetin impiçmenti ilə bağlı birbaşa səsvermənin keçirilməsinə mane olub.
İmpiçment təşəbbüsünü Respublikaçılar Partiyasından olan konqresmen Tomas Massi irəli sürmüşdü. O, müdafiə nazirini Konstitusiyanı pozmaqda və qanunsuz hərbi əməliyyatların həyata keçirilməsində ittiham edib.
Ağ Ev isə noyabrın 10-da yayımladığı rəsmi bəyanatda Massinin təşəbbüsünə qəti şəkildə qarşı çıxdığını bildirib.
“Administrasiya Heqsetə qarşı bu impiçment qətnaməsinə qətiyyətlə qarşı çıxır. Bu, hərbçilərimizin mövqeyini, ölkəmizin Konstitusiyasını və milli təhlükəsizliyimizi zəiflətməyə yönəlmiş siyasi motivli cəhddir”, – deyə bəyanatda vurğulanıb.
Tramp administrasiyasının fikrincə, impiçment təşəbbüsü ABŞ Prezidentinin ali baş komandan kimi qəbul etdiyi milli təhlükəsizlik qərarlarını şübhə altına alır.
Ağ Ev bildirib ki, Heqset Prezident Donald Trampın göstərişi ilə hərbi əməliyyatların həyata keçirilməsini təmin edib və bunun özü impiçment üçün hüquqi əsas yaratmır.
Bəyanatda qeyd olunub ki, şəxsi və siyasi fikir ayrılıqları, eləcə də dövlət siyasəti ilə bağlı mübahisələr avtomatik olaraq impiçmentə səbəb ola biləcək hüquq pozuntusu hesab edilə bilməz.
Administrasiya həmçinin müdafiə nazirinin hərbi əməliyyatların icrasına görə vəzifədən uzaqlaşdırılmasının təhlükəli presedent yaradacağını iddia edib.
Ağ Ev bu təşəbbüsün Amerika xalqının iradəsinə zidd olduğunu da bildirib.
Massinin təqdim etdiyi səkkiz maddəlik qətnamədə isə Heqsetin İrana qarşı müharibənin Konqresin razılığı olmadan davam etdirilməsində rolu əsas ittihamlardan biri kimi göstərilib.
Digər ittihamlar arasında Karib hövzəsində narkotik qaçaqmalçılığında şübhəli bilinən şəxsləri daşıyan qayıqlara ölümcül zərbələr, Venesuelada Nikolas Maduronun ələ keçirilməsi əməliyyatı və senator Mark Kelliyə qarşı görülən tədbirlər yer alıb.
Heqset ittihamları rədd edərək impiçment təşəbbüsünü siyasi tamaşa adlandırıb. O, həyata keçirilən hərbi əməliyyatların qanuni olduğunu müdafiə edib.
Prezident Donald Tramp da müdafiə nazirinə dəstək verərək onun vəzifəsində qalmasını istədiyini açıqlayıb.
Nümayəndələr Palatasının qərarı Heqsetin impiçment yolu ilə vəzifədən uzaqlaşdırılması təşəbbüsünü hələlik dayandırıb. Bununla belə, qətnamənin komitəyə göndərilməsi ittihamların mahiyyəti üzrə araşdırılaraq əsassız hesab edilməsi demək deyil.
Konqresdə siyasi qüvvələr balansının dəyişməsindən sonra məsələnin yenidən gündəmə gətirilməsi ehtimalı qalır.