ABŞ-də parazit mənşəli bağırsaq infeksiyası olan siklosporiazla bağlı təsdiqlənmiş və ehtimal olunan halların ümumi sayı 18 mini keçib. Xəstəlik ölkənin 45 ştatında qeydə alınıb. Bu barədə ABŞ Xəstəliklərə Nəzarət və Profilaktika Mərkəzi məlumat yayıb.
Redaksiya istinadla xəbər verir ki, may ayından bu yana laboratoriya müayinələri ilə 6 707 yerli yoluxma halı təsdiqlənib. Xəstələrdən 423-ü hospitala yerləşdirilib. Bundan başqa, əlavə araşdırma tələb edən 11 500-dən çox ehtimal olunan hal qeydə alınıb.
Bəzi yoluxmaların doqquz ştatdakı restoranlarda istifadə edilmiş doğranmış aysberq kahısı ilə əlaqəli olduğu müəyyənləşdirilib. Bununla belə, bütün halların vahid qida mənbəyindən qaynaqlandığı bildirilmir.
Siklosporiaz “Cyclospora” adlı mikroskopik parazitin törətdiyi bağırsaq infeksiyasıdır. Xəstəlik əsasən çirklənmiş su, çiy tərəvəz və meyvələr vasitəsilə yayılır, uzunmüddətli və güclü ishal, qarın ağrısı, ürəkbulanma, iştahasızlıq və halsızlığa səbəb ola bilər. CDC-nin həftəlik statistikasındakı göstəricilərin ilkin olduğu və sonradan dəyişə biləcəyi qeyd olunur.