Ukrayna Prezidenti Volodimir Zelenski amerikalı milyarder İlon Maskın SpaceX şirkətinin Ukraynadakı fəaliyyəti ilə bağlı onunla əlaqə saxlamadığını bildirib. Zelenski həmçinin Ukraynanın SpaceX tərəfindən hazırlanmış Starshield sisteminə hələ də çıxış əldə etmədiyini açıqlayıb.
Redaksiya məlumat verir ki, Ukrayna lideri SpaceX ətrafında baş verən hadisələrdən sonra Maskla şəxsən danışmaq istədiyini, lakin amerikalı sahibkarın onunla əlaqə yaratmadığını söyləyib.
“SpaceX ilə bağlı bütün bu hadisələrdən sonra onunla danışmaq istəyirdim. Amma o, bizimlə əlaqə saxlamadı”, – deyə Zelenski bildirib.
Ukrayna Prezidenti İlon Maskın Ukraynanı dəstəkləyən mövqe tutmamasından da narazılığını ifadə edib.
Zelenskinin sözlərinə görə, Kiyev Starshield sisteminə çıxış əldə etmək məsələsini ABŞ Prezidenti Donald Trampla dəfələrlə müzakirə edib.
“Biz bu barədə ABŞ Prezidenti Donald Trampla üç və ya dörd dəfə danışmışıq. O, cəhd edəcəyini dedi, lakin bunun ondan asılı olmadığını, SpaceX-dən asılı olduğunu bildirdi”, – deyə Zelenski vurğulayıb.
Starshield SpaceX şirkətinin hökumət və müdafiə qurumları üçün nəzərdə tutduğu peyk rabitəsi və əlaqəli xidmətlər sistemidir.
Zelenskinin açıqlamasından görünür ki, Ukraynanın bu sistemə çıxış əldə etməsi məsələsində hələlik razılıq əldə olunmayıb.
İlon Maskın və SpaceX şirkətinin Zelenskinin son açıqlamalarına münasibəti barədə məlumat verilməyib.