Ukrayna Prezidenti Volodimir Zelenski ABŞ-ı Rusiyaya qarşı iqtisadi təzyiqi kəskin artırmağa və Ukraynaya əlavə texnoloji imkanlar verməyə çağırıb. O, Moskvanın iqtisadiyyatının mümkün qədər təcrid olunmasını və Rusiya hərbi sənayesinə qarşı sanksiyaların sərtləşdirilməsini istəyib. Bu barədə Interfax-Ukraine məlumat yayıb.
Redaksiya istinadla xəbər verir ki, Zelenski ABŞ Dövlət katibi Marko Rubionun müharibənin “strateji dalana” çatması barədə açıqlamasına cavab verərkən “Putinin bütün iqtisadiyyatını bağlayın, Rusiyanın ağzını bağlayın” ifadəsini işlədib.
Ukrayna lideri Qərb ölkələrinin Rusiya ilə gələcək iqtisadi layihələri müzakirə etməsini də tənqid edib. Onun fikrincə, bir tərəfdən Moskva ilə əməkdaşlıq imkanlarından danışmaq, digər tərəfdən isə diplomatik çıxılmaz vəziyyətdən bəhs etmək ziddiyyətlidir.
Zelenski həmçinin ABŞ-dan Ukrayna üçün Starlink imkanlarını genişləndirməyi istəyib. O, Vaşinqtonun İranla qarşıdurma zamanı istifadə etdiyi texnoloji və hərbi imkanları nümunə göstərərək ABŞ-ın istədiyi zaman hava məkanına nəzarət üçün çox böyük imkanlara malik olduğunu bildirib.
Zelenski İsrailin İran üzərində hava üstünlüyü əldə etməsini misal çəkərək Ukraynaya da öz səmasını daha effektiv müdafiə etmək üçün yardım göstərilməsini istəyib. Onun sözlərinə görə, belə üstünlük əldə olunarsa, Rusiya Prezidenti Vladimir Putinin danışıqlar masasına gəlməsi üçün təzyiq əhəmiyyətli dərəcədə arta bilər.
Ukrayna prezidenti bu fikirlərin siyasi və hərbi qiymətləndirmə olduğunu bildirib. Starlink-in Rusiya ərazisi üzərində Ukrayna üçün hansı konkret imkanlarla açılmasının nəzərdə tutulduğu və ABŞ-ın belə addıma hazır olub-olmadığı barədə rəsmi qərar açıqlanmayıb.