Türkiyə ilə Nigeriya arasında müdafiə sahəsində əməkdaşlıq haqqında rəsmi saziş imzalanıb. Saziş iki ölkə arasında hərbi, təhlükəsizlik və strateji əməkdaşlığın genişləndirilməsinə yönəlib və terrorizmə qarşı birgə mübarizəni prioritet istiqamət kimi müəyyən edir.
Redaksiya xəbər verir ki, Türkiyə Prezidenti Rəcəb Tayyib Ərdoğan bu münasibətlə çıxış edərək, Nigeriyanın dost xalqının terrorizmə qarşı apardığı mübarizədə Türkiyənin daim onun yanında olduğunu bildirib. Prezident vurğulayıb ki, tərəflər hərbi təlim və kəşfiyyat sahələrində daha sıx əməkdaşlıq imkanlarını ətraflı şəkildə dəyərləndiriblər.
Ərdoğan Nigeriya Prezidenti Bola Tinubu ilə görüşü zamanı iqtisadi məsələlərə də toxunub. O bildirib ki, aparılan danışıqlarda iki ölkə arasında illik ticarət dövriyyəsinin 5 milyard dollar səviyyəsinə çatdırılması hədəfi bir daha təsdiqlənib və bu məqsədə nail olmaq üçün atılmalı olan addımlar müzakirə edilib.
Qeyd edilib ki, Nigeriya Afrikada ən böyük neft və təbii qaz istehsalçısıdır. Bu amil iki ölkə arasında enerji, təhlükəsizlik və iqtisadi sahələrdə əməkdaşlığın daha da dərinləşdirilməsi üçün geniş perspektivlər yaradır.